آستانہ۔3جولائی(اے پی پی) وزیراعظم محمد شہباز شریف اتے روس دے صدر ولادی میرپیوٹن تجارت تے توانائی سودھے مختلف شعبیں اچ تعلقات کوں تکڑا بݨاوݨ تے اتفاق کیتے جݙاں جو وزیراعظم محمد شہباز شریف آکھیے کوئی جغرافیائی سیاسی تبدیلی ساݙے تعلقات تے اثر انداز نی تھی سڳدی ݙوہیں ملکاں دے تعلقات سدھے پاسے ٹردے پئن ۔ اساکوں مستقبل اچ آپݨے تعلقات مزید ودھاوݨے ہوسن ۔ وزیراعظم محمد شہباز شریف تے روس دے صدر ولادی میر پیوٹن دی ملاقات اتھاں ٻدھ کوں تھئی ۔ وزیراعظم صدر پیوٹن کوں ول روس دا صدر بݨݨ دی مبارخ ݙتی تے امید ظاہر کیتی جو انہاں دی قیادت اچ روس مزید ترقی کریسی ۔ وزیراعظم آکھیے تساں نال ملاقات کرتے ٻہوں چنڳاں لڳے ۔انہاں آکھیے پاکستان دے روس نال نیڑے تعلقات ہن، پاکستان تے روس عرصہ وݙے عرصے توں دوست ملک ہن، اساکوں مستقبل اچ تعلقات مزید تکڑے بݨاوݨے ہوسن ،پاکستان دے روس نال پراݨے تے کاروباری تعلقات ہن۔انہاں آکھیے پاکستان تے روس دے تعلقات سدھے پاسے ٹردے پئن میں تساں نال رل تے کم کرݨ چاہنداں تاں جو انہاں تعلقات کوں مزید مستحکم بݨایا ونڄ سڳے۔ وزیراعظم آکھیے تساݙے تجربے توں فیدہ چا سڳدوں تے سانجھی تجارت ودھا سڳدوں جیڑھی ویں ویلھے ھک ارب ڈالر دے نیڑے ہے ۔ وزیراعظم آکھیے میݙی درخواست تے تساں پاکستان نال توانائی دے شعبے اچ تعاون ودھاوݨ تے اتفاق کیتا ہئی ، روس توں تیل دی سپلائی اساکوں ملی اساں ایں کوں مزید ودھاوݨ چاہندوں ۔ انہاں آکھیے ساݙے تعلقات تکڑی بنیاداں تے ہن تے کوئی جغرافیائی سیاسی تبدیلی انھاں تعلقات تے اثر انداز نی تھی سڳدی تے نہ ہی ݙوجھے ملکاں نال ساݙے تعلقات تے اثر انداز تھی سڳدن۔ وزیراعظم آکھیے پاکستان دے روس نال پراݨے کاروباری رابطے ہن تے اساکوں مستقبل اچ انہاں تعلقات کوں مزید مستحکم بݨاوݨا ہوسی ۔وزیر اعظم آکھیے پچھلی ملاقات اچ وی میں تساں نال ذکر کیتا ہئی جو 60ء اتے 70 ء دے ݙھاکے اچ اساں بارٹر سسٹم دے تحت تجارت شروع کیتی ہئی تے اساں سابق سوویت یونین توں مشینری تے ٻئی مصنوعات درآمد کرتے ٹیکسٹائل تے چمڑے دی مصنوعات درآمد کریندے رہیے ، اساکوں مالیاتی تے ٻئے بینکاری مسئلے حل کرݨ دی لوڑھ اے ۔ روس نال بارٹر سسٹم دے تحت تجارت ودھاوݨ چاہندوں جیڑھا جو پاکستان سانڳے فیدہ مند ثابت تھیسی ۔ ایں توں پہلے اساں ٻہوں سارے مسئلیں تے قابو پا سڳدوں ۔ وزیراعظم آکھیے آپݨی تے پاکستانی قوم دی طرفوں ݙساوݨ چاہنداں جو اساں روس نال تعلقات مزید تکڑے کرݨ چاہندوں ۔ ایں موقع تے روس دے صدر ولادی میرپیوٹن آکھیے تساں نال ول مل تے خوشی تھئی اے ݙو سال پہلے اساں شنگھائی تعاون تنظیم دے اجلاس اچ سمرقند ملیے ہاسے اساں ݙو پاسے امور کوں اڳوں ودھاوݨ تے ڳالھ مہاڑ کیتی ہئی انہاں آکھیے پاکستان تے روس وچال بہترین تعلقات ہن ، ݙوہیں ملکاں وچال تجارتی رابطے پاروں ݙو پاسے تعلقات اچ مزید بہتری آئی اے ۔ روس دے صدر آکھیے توانائی اتے زراعت دے شعبیں اچ اساں آپݨے تعاون کوں ودھا سڳدوں ، غذائی تحفظ دے شعبے اچ وی پاکستان نال تعاون ودھیسوں۔(
.jpg)
.jpg)
