ڈیرہ اسماعیل خان۔25جولائی(اے پی پی) وزیراعظم محمد شہباز شریف آکھیے خیبرپختونخوا اچ سڑکاں سودھے ٻئے ترقیاتی منصوبیں دا ڄال وچھایا ویندا پئے ،قوم دی حالت بدلݨ کیتے کشکول کوں بھنݨا ہوسی ، شہنشاہی خرچے گھٹ تےکرپشن مکائے بغیر ملک ترقی نی کرسڳدا ،اساکوں ہوا، شمسی توانائی اتے پن بجلی منصوبیں تے توجہ ݙیوݨی چاہیدی اے ،جے ماضی اچ انہاں شعبیں تے توجہ ݙتی ویندی تاں ملک دی معاشی حالت اے نہ ہوندی ۔اے ڳالھ انہاں ڈیرہ اسماعیل خان اچ 8 وݙے ترقیاتی منصوبیں دا افتتاح اتے سنگ بنیاد رکھݨ دی تقریب توں خطاب کریندے ہوئیں آکھی اے ۔ انہاں آکھیے موجودہ حکومت کوں تاریخ دے اوکھے ترین چیلنجز ورثے اچ ملیے ، مختصر دورحکومت اچ چیلنجز نال نبݨݨ دی بھرپور کوشش کیتی ،11 اپریل 2022کوں آپݨے عہدہ دا حلف چاتا تاں احساس تھیا جو حالات ٻہوں اوکھے ہن لیکن ایندا اندازہ نہ ہئی جو حددرجہ تباہ کن ہن ۔ انہاں آکھیے گزریل سال پاکستان دی تاریخ دا تباہ کن سیلاب آیا ، ملک اچ 3کروڑ 30 لکھ لوک سیلاب توں متاثر تھئے، وفاقی حکومت سیلاب متاثرین دی بحالی کیتے 100ارب روپے دے فنڈز ݙتے، صوبیں امدادی کارروائیاں اچ بھرپورحصہ پاتا۔ انہاں آکھیے ملک کوں سیلاب، مہانگے تیل دی درآمد، دہشت گردی ، سیاسی افراتفری اتے سابق حکومت دی طرفوں آئی ایم ایف دے نال معاہدہ بھنݨ دے بعد ایندی بحالی جیہے چیلنجز دا سامݨا ہئی، اساں ہمت نہ ہاری ، ڈٹ تے چیلنجز دا سامݨا کیتا ۔ انہاں آکھیے خیبرپختونخوا اچ سڑکاں سودھے ٻئے ترقیاتی منصوبیں دا ڄال وچھایا ویندا پئے ۔ انہاں منصوبیں توں علاقے کوں وسطی ایشیائی ملکاں نال رلاوݨ اچ مدد ملسی ۔ ڈیرہ اسماعیل خان توں ژوب تئیں بجلی دی ترسیلی لائن وختی مکمل تھیسی ، قوم دی حالت بدلݨ کیتے کشکول کوں بھنݨا پوسی ، ایس آئی ایف سی دے ذریعے ملکی ترقی دا جامع منصوبہ بݨائے ، اے معاشی بحالی دا منصوبہ اے۔ ایں موقع تے وزیراعظم ٻہوں سارے منصوبیں دا افتتاح اتے سنگ بنیاد رکھیا۔تقریب توں وفاقی وزیر مواصلات مولانا اسعد محمود،وفاقی وزیر توانائی انجینئر خرم دستگیر،وزیرمملکت پٹرولیم مصدق ملک اتے پی ڈی ایم دے سربراہ مولانا فضل الرحمان وی خطاب کیتا۔
