شرم الشیخ۔13اکتوبر(اے پی پی) وزیراعظم محمد شہباز شریف اتے قطر دے امیر شیخ تمیم بن حمد الثانی آپت دے مفاد دے علاقائی اتے بین الاقوامی امور تے نیڑے رابطے برقرار رکھݨ تے اتفاق کیتے۔وزیراعظم دفتر دے میڈیا ونگ توں جاری بیان موجب شرم الشیخ اچ غزہ دے حوالے نال امن سربراہ اجلاس دے موقع تے وزیراعظم محمد شہباز شریف اتے قطر دے امیر شیخ تمیم بن حمد الثانی دی ملاقات تھئی۔ ملاقات اچ ݙوہیں رہنماواں پاکستان اتے قطر وچال تکڑے اتے تاریخی ݙو پاسے تعلقات دا عزم دُہرائے اتے مختلف شعبیں اچ پاکستان قطر تعاون کوں مزید وسعت ݙیوݨ کیتے مشترکہ عزم دا اظہار کیتا۔ وزیراعظم قطر دے امیر دی مثالی قیادت، سفارتکاری اتے ݙوجھے بھرا ملکاں دے نال تعاون دی تعریف کیتی جیں دے نتیجے اچ شرم الشیخ اچ تاریخی امن معاہدے تے دستخط ممکن تھئے۔ ایں دے نال نال وزیرِ اعظم غزہ دے بحران دا منصفانہ اتے دیرپا حل لبھݨ کیتے قطر دیاں مسلسل کوششاں دی تعریف کیتی۔امن معاہدے نال لکھاں فلسطینیاں کیتے آپݨیاں زندگیاں کوں ول شروع کرݨ اتے نویں سروں تعمیر کیتے امید پیدا تھئی اے۔ وزیراعظم 1967ء توں پہلے دیاں سرحداں اتے القدس شریف دے بطور دارالحکومت دے نال ہک آزاد، چل سڳݨ آلی فلسطینی ریاست دے قیام دے حق اچ پاکستان دے پراݨے موقف تے زور ݙتا۔ انہاں فلسطینی عوام کیتے انسانی بنیاداں تے امداد ݙیوݨ کیتے پاکستان دی مسلسل حمایت دا وی عزم دُہرایا۔ قطر دے امیر پاکستان دی یکجہتی اتے فلسطین دے بارے اچ اصولی موقف تے وزیراعظم دا شکریہ ادا کیتا اتے ایں امید دا اظہار کیتا جو عالمی برادری دی مستقل توجہ خطے اچ دیرتئیں امن و استحکام گھن آوݨ اچ مددگار ثابت تھیسی۔ ݙوہیں رہنماواں آپت دے مفاد دے علاقائی اتے بین الاقوامی معاملیں تے نیڑے رابطے اچ رہݨ تے اتفاق کیتا۔ گزریل ہک مہینے اچ ݙوہیں رہنماواں وچال اے چوتھی ملاقات اے۔ ستمبراچ وزیراعظم دے دوحہ دے دورے اتے ایں دے بعد اقوام متحدہ دی جنرل اسمبلی دے 80ویں اجلاس دے موقع تے نیویارک اچ وی انہاں دی ملاقات تھئی ہئی۔
.jpg)
.jpg)
.jpg)
